أم محمد.
قلت لها: لازم نوفر ميه يا أم محمد، حتحصل أزمة ميه.
قالت: إيه ده؟ بجد؟
قلت: أيوه.. فيه مشكلة في النيل..
قالت: أيوه.. أسمع عنه النيل ده.
قلت: تسمعي عنه؟ إحنا بنشرب من النيل
قالت: هي الميه اللي بتنزل من الحنفية دي جاية من
الكورنيش؟
ما أنا راخرة سئيلة قوي، فهذه سيدة تقطن في حي فقير،
ينقطع الماء عنها نصف اليوم وربما أكثر، إلي جانب انقطاع الكهرباء، وتعتبر
نفسها من المحظوظين لأن لديها صنبورا، أحيانا ينزل منه ماء. أقوم أروح
بمنتهي الغلاسة، وقلة الحساسية، والغباء من جانبي، وأقول لها: وفري ميه!
إذا كانت حياتها كلها توفير، وأهي طلعت مثقفة وسامعة عن النيل سمع خير.
المثقف.
قال: أنت شعبوية وما عندكيش فهم استراتيجي للأمور،
حماس وقناة الجزيرة خطر علينا، بيضربوا قوتنا الناعمة في المنطقة لصالح
إيران من خلال شيطنتنا وتصويرنا بشكل سلبي وإقناع السذج من أمثالك إننا ضد
القضية الفلسطينية وبنعمل لصالح إسرائيل وأمريكا.
قلت: يا عم أنا شعبوية وجاهلة وما بافكش الخط.. يرضي
ربنا إن يوسف أبو زهري يدخل مصر علي رجليه، يرجع لأهله جتة، وجتة ملونة
كمان؟
قال: ما هو ده بقي الدور اللي بتلعبه حماس والجزيرة،
إنهم يمسكوا في حدث زي ده ويكبروه، يعني حماس ما بتقتلش حد؟ وبعدين يوسف
أبو زهري ده متسلل، من حقنا نحمي سيادتنا، مين دولة في الدنيا تسمح للناس
إنها تتسلل علي حدودها؟
قلت: أنا مالي ومال حماس دلوقت أنا؟ اللي أعرفه إن
يوسف أبو زهري اللي كان داخل يتعالج عندنا رجع جتة، والصحفي الإسرائيلي
تسلل لحدودنا عشان يتجسس علينا رجع معزز مكرم..
قال: إنت حتستهبلي؟ إنت عايزة تجيبي ده زي ده؟ دي ناس
قطها جمل وجابوا لبنان عاليها واطيها عشان أسيرين، عايزاهم يموتونا؟ ده من
غير ما نعملهم حاجة عايزين يعطشونا، إنما حماس دول لو موتنا نصهم حتي
حيعملوا لنا إيه يعني؟
الشعبويون، السذج، الجهلاء من أمثالي، يعتقدون أن هذا
المنطق لا يوصف إلا بأنه «أخلاق واطية».
سائق التاكسي.
قال: إسرائيل مهما عليت يا آنسة (فرحت قوي إنه قال لي
يا آنسة) حتنتهي حتنتهي، ولعلمك، ماحدش حيخلص علي إسرائيل إلا التعلب
بتاعنا، هو بياخدهم علي عقلهم دلوقت لحد ما يجيب رجلهم، وبعدين يقضي عليهم
خالص زي صلاح الدين الأيوبي، أمال هم بيجيبوا الفيلم ليه يوم عيد ميلاده؟
وبعدين إسرائيل مش حيتقضي عليها إلا يوم القيامة..
قلت: يعني إسرائيل والتعلب بتاعنا قاعدين ليوم
القيامة؟
قال: إن شاء الله..
قلت: علي كده يوم القيامة قرب؟
قال: لااا.. لسه، فيه علامات كتير، لسه لمن العرب
يتوحدوا، ولمن نطلع الإنجليز من العراق، ولمن أمريكا تولع.. ما كل ده في
الكرآن، أنا أي نعم مش بصلي إكمني سواق، بس اللي في الكرآن حصل، وحيحصل.
